Servus midananda,

I derf mi vorstelln: i bin da Opa Xade.

I bin a Feuer(wehr)salamander und seit 12.07.2024 stolzes Mitglied und Maskottchen der Jugendfeierwehr Postau.

Des ganze hod ogfangt in da Jugendleistungsprüfung 2023 in Essabo. dJugendfeierwehr hod si denkt Sie brauchan Unterstützung und do is der erste Gedanke an a Maskottchen aufkemma. Bis zur Funkübung in Hölskofen am 27.06.2024 is des aber nur a gloana Hintergedanke blimm. An dem Dog ham Hannah, Lilly und Lina si den Gedanken dann nummoi durchn Kopf geh lassn und ham si darauf geeinigt, mi zum frong, ob i des macha darad. I hob dann erst moi in meinm Kleiderschrank gewühlt und als i mei oids Jugendfeierwehrgwand gfund hob, hob i Erna glei a Zusage gehm. Ois i dann moi einegschlupft bin und festelln hob mia n, dass ma nimma basst is ma glei da Gedanke kemma, dass dTaglinger Mutti ja a subba Schneiderin is und hab mi glei aufn Weg zu ihra gmacht. So wie Sie is hods natürlich glei ogfangt mitm Nahn und kurze Zeit drauf wars a scho fertig. Zur nachsten Jugend-Übung wo si de Junga Feierwehler und Feierwehrlerinnen aufd Jugendleistungsprüfung vorbereitet ham bin i natürlich glei mit meinm neuen Outfit aufgschlong und hob den Mitgliedsantrag unterzeichnet. Oan Dog drauf, am 13.07.24 war dann a scho mei erster Einsatz bei da Jugendleistungsprüfung in Ergoldsbach wo i dJugend vo Postau begleitet und unterstützt hob. Und weils fürdes Wochenende no ned gnua war, hab i am 14.7.24 glei no in da Kinderbetreuung beim Florianifest tatkraftig unterstützt. Ois i dann so Über des vergangene Wochenende nochdacht hab, hob i ma a a gloans Biache zuaglegt wo i ois eineschreim konn, wos i mit de Madls und Jungs erlebt hab. As "Opa Xade Erlebnisbuch".